Në një intervistë për Radio Televizionin Iliria, neuropsikiatri Sami Rexhepi, drejtor i Qendrës së Shëndetit Mendor në Prishtinë, flet për sfidat me të cilat ballafaqohet qendra në përmbushjen e nevojave të shëndetit mendor të regjionit të Prishtinës. Ndër tjerash, në intervistë bëhet e dukshme se:
- Nevoja për shërbime e tejkalon kapacitetin për ofrim të tyre: Duke shërbyer përafërsisht 1800 individë në regjionin e Prishtinës, sipas Rexhepit, qendra operon në një hapësirë që mbulon më pak se 20% të nevojave aktuale.
- Burime të kufizuara, nevoja në rritje: Pavarësisht ofrimit të shërbimeve të tilla si mbështetje psikiatrike dhe asistencë psikologjike, qendra përballet me mungesë të thellë stafi, me vetëm 2 psikiatër, njëri ndër ta vetë drejtori i kësaj qendre, dhe 2 psikologe klinike që aktualisht tregohet të jenë në përfundim të specializimit për psikologji klinike.
- Nevoja urgjente për zgjerim: Rexhepi thekson nevojën për një qendër shtesë për të mbuluar hendekun midis kapaciteve aktuale dhe kërkesës në rritje për mbështetje të shëndetit mendor.
E themeluar më 17 shtator 2003, Qendra e Shëndetit Mendor në Prishtinë ka qenë një burim i rëndësishëm me një sërë shërbimesh të shëndetit mendor duke filluar nga asistenca psikiatrike dhe psikologjike deri te kujdesi ditor, terapitë individuale dhe grupore, aktivitetet rehabilituese dhe programet rekreative. Megjithatë, kërkesa dërrmuese dhe burimet e kufizuara nxjerrin në pah nevojën urgjente për zgjerim dhe mbështetje të menjëhershme.
…
Intervistën mund ta gjeni duke klikuar këtu.
