Një studim i fundit i kryer në Universitetin e Turku në Finlandë ka zbuluar se truri i njeriut ka një rrjet të gjerë nervor që përpunon informacione të ndryshme sociale. Studimi tregoi se bota perceptuese sociale e njerëzve përbëhet nga një grup i kufizuar dimensionesh kryesore, të tilla si sjellja antisociale, sjellja seksuale ose shoqëruese dhe komunikimi. Këto dimensione sociale përpunohen në rajone të ndryshme të trurit të vendosura kryesisht në pjesën e pasme të trurit, më konkretisht në lobin oksipital dhe temporal.
Për ta realizuar studimin, studiuesit treguan video të shkurtra filmash të situatave të ndryshme sociale për 97 pjesëmarrës, ndërsa matën aktivitetin e trurit të tyre me imazhe funksionale të rezonancës magnetike (fMRI) në kohë reale. Një grup tjetër pjesëmarrësish vlerësuan shfaqjen e mbi njëqind veçorive sociale në të njëjtat klipe filmash. Studiuesit vunë re se aktiviteti i trurit në rajonet e rëndësishme për perceptimin shoqëror sinkronizohet midis individëve të ndryshëm kur ata shikojnë filma që përshkruajnë situata sociale. Sinkronizimi i aktivitetit të trurit do të thotë që përpunimi i informacionit është mesatarisht i ngjashëm midis individëve të ndryshëm. Rezultatet e këtij studimi nxjerrin në pah natyrën e shpërndarë të përpunimit social në tru.
Studimin e plotë origjinal mund ta gjeni duke klikuar këtu.
