Individët që përballen me çrregullime të rënda të shëndetit mendor si skizofrenia, çrregullimi bipolar dhe depresioni madhor raportohet të përjetojnë sëmundje kardiovaskulare në dyfishin e shkallës së atyre pa këto çrregllime.
Pirja e duhanit raportohet të jetë shumë e përhapur në këtë popullatë dhe, njëkohësisht, shkaktari kryesor i vdekjeve të parandalueshme te njerëzit me këto çrregullime.
Gjithsesi, përveç që intervenimet për këtë çështje në këtë grup janë pak në numër, edhe kur ata marrin trajtim, rrallë herë mirren në konsideratë efektet e shpeshta anësore shëndetësore (p.sh., shtimi në peshë).
Një studim i publikuar së fundmi thekson nevojën për ndërhyrje gjithëpërfshirëse që adresojnë pikërisht këto shqetësime të ndërthurura shëndetësore.
Studimi, i kryer midis korrikut 2016 dhe marsit 2020 në katër programe shëndetësore në komunitet, u fokusua tek të rriturit me çrregullime të rënda të shëndetit mendor që ishin duhanpirës të përditshëm. Pjesëmarrësit u caktuan në mënyrë rastësore ose në një grup ndërhyrjeje ose kontrolli, duke marrë parasysh gatishmërinë e tyre për të lënë duhanin menjëherë (brenda 1 muaji) ose brenda një afati kohor 6-mujor. Ndërhyrja ishte një program rigoroz 18-mujor që integronte farmakoterapi, këshillim individual dhe grupor, strategji për lënien e duhanit dhe parandalimin e rikthimit, këshillim për menaxhimin e peshës dhe mbështetje për aktivitetin fizik.
Nga 298 individë të ekzaminuar, 192 u regjistruan në studim, duke përfaqësuar një grup divers për sa i përket racës, përkatësisë etnike dhe diagnozave të lartëpërmendura. Një pjesë e konsiderueshme shprehën interesin për të lënë duhanin menjëherë. Studimi gjeti se në periudhën 18-mujore, 26.4% e pjesëmarrësve në grupin e ndërhyrjes arritën abstinencë krahasuar me 5.7% në grupin e kontrollit. Në mënyrë inkurajuese, grupi i ndërhyrjes nuk përjetoi rritje të konsiderueshme në peshë në krahasim me grupin e kontrollit.
Ky hulumtim, duke arritur një shkallë të jashtëzakonshme suksesi në abstinencën e duhanit dhe duke adresuar shqetësimet në lidhje me shëndetin, ofron njohuri kritike për adresimin e sfidave të shëndetit fizik me të cilat përballen individët me çrregullime të rënda të shëndetit mendor dhe thekson potencialin për ndërhyrje të shkallëzuara për të përmirësuar në mënyrë rezultatet shëndetësore të kësaj popullate.
Referenca: Daumit, G. L., Evins, A. E., Cather, C., Dalcin, A. T., Dickerson, F. B., Miller, E. R., III, Appel, L. J., Jerome, G. J., McCann, U., Ford, D. E., Charleston, J. B., Young, D. R., Gennusa, J. V., III, Goldsholl, S., Cook, C., Fink, T., & Wang, N.-Y. (2023). Effect of a tobacco cessation intervention incorporating weight management for adults with serious mental illness: A randomized clinical trial. JAMA Psychiatry, 80(9), 895−904. https://doi.org/10.1001/jamapsychiatry.2023.1691
